Պատկերացրո՛ւ, որ ունես 500,000 դրամ խնայողություն: Որտե՞ղ պահես՝ բարձի տա՞կ,  բանկո՞ւմ, թե՞ այլ տեղ:

Անկանխիկ խնայողությունները շատ առավելություններ ունեն:

Նախ՝ անվտանգ են: Բանկային հաշիվներում ու քարտերում գումարը պահելով՝ կքչացնես գողության, կորստի ռիսկը։ Բացի դրանից՝ Ավանդների հատուցումը երաշխավորող հիմնադրամն էլ երաշխավորում է, որ դու հետ կստանաս ավանդիդ գումարը, եթե անգամ բանկը սնանկանա: Բայց կան սահմանաչափեր. ամեն բանկում դրամային ավանդների դեպքում մինչև 16 մլն դրամի չափով, իսկ արտարժույթային ավանդների դեպքում՝ մինչև 7 մլն դրամի չափով։

Երկրորդ՝ հարմարավետ է: Քո գումարը միշտ հասանելի է, երբ պետք է։ Լինի դա քարտի վրա, թե ավանդում, երբ դու նախապես տեղեկացնես բանկին և պահանջես գումարը, ապա ավանդի մայր գումարն առանց խոչընդոտների հետ կստանաս։

Երրորդ՝ եկամտաբեր է: Դոշակը կամ էլ բարձը քեզ հաստատ ավել գումար չեն տա, իսկ այ խնայողական հաշիվը կամ ավանդը քեզ տոկոսներ կբերեն: Օրինակ՝ 500,000 դրամը տարեկան 8%-ով ավանդ դնելու դեպքում տարվա վերջում կունենաս[3]  36,000 դրամ եկամուտ:

Չորրորդ՝ պաշտպանված ես գնաճից: Քո գումարի արժեքը չի նվազի ժամանակի ընթացքում, և դու կկարողանաս նույնքան կամ ավելի շատ ապրանքներ գնել խնայած գումարով։

Կարող ես սկսել խնայողական հաշվից. այն ավելի ճկուն է, և կարող ես գումար ավելացնել ու պակասեցնել։ Այնուհետև շարունակել ավանդով՝ գումարդ ավելի երկար ժամանակով ներդնելով բանկում։ Իհարկե հետո կարող ես անցնել ֆինանսական այլ բազմերանգ գործիքներին՝ պարտատոմսներին, բաժնետոմսերին և այլն։

Բաժանի՛ր քո խնայողությունները տարբեր գործիքների միջև՝ հաշվի առնելով քո նպատակները:

Խնայի՛ր, կատարի՛ր ներդրումներ, եղի՛ր բարեկեցիկ: