Եթե համաձայն չես ԱՊՊԱ պատահարի հետևանքով գույքային վնասի հատուցման որոշման հետ կամ համաձայն չես մեղավորության հետ կապված, ահա թե ինչ կարող ես անել՝

Առաջին քայլ. դիմի՛ր քո ապահովագրական ընկերությանը:

 Կարող ես ընտրել անվճար լրացուցիչ փորձաքննությունը, որին դիմելու համար 2 աշխատանքային օր ունես: Պատասխան կստանաս 3-5 աշխատանքային օրում:

Երկրորդ քայլ. կարող ես դիմել Ֆինանսական համակարգի հաշտարարին։ Հաշտարարի ծառայություններն անվճար են։

 Իսկ եթե ստացել ես ապահովագրական ընկերության պատասխանը, բայց ցանկանում ես դիմել կրկնակի փորձաքննության, դա հնարավոր է նշանակել որոշման ծանուցումը ստանալուց հետո 5 աշխատանքային օրվա ընթացքում՝ կրկին դիմելով ծանուցումն ուղարկած ապահովագրական ընկերությանը։ Սակայն այս դեպքում փորձաքննությունը պատվիրակում է արդեն Ավտոապահովագրողների Բյուրոն՝ վճարովի հիմունքներով։

Այսինքն, բողոքարկման ցանկության դեպքում դու լրացնում ես կրկնակի փորձաքննության նշանակման դիմումը, կատարում դրա համար վճարումը, և դիմումի ու վճարման անդորրագրի հետ միասին ուղարկում ապահովագրական ընկերությանը։ Ապահովագրական ընկերությունը փաթեթը ստանալուց հետո այն փոխանցում է Բյուրոյին՝ բողոքարկմանը ընթացք տալու համար։

Վերջին քայլդ՝ կրկնակի փորձաքննության արդյունքները կարող ես բողոքարկել դատարանում։

 Այսպիսով՝ հիշի՛ր՝

Նախ պետք է դիմես քո ապահովագրական ընկերությանը, հետո կարող ես դիմել նաև Ֆինանսական համակարգի հաշտարարին։

Բյուրոն ներգրավվում է միայն կրկնակի փորձաքննության դեպքում։

Կարող ես դիմել նաև դատարան։

Ճանաչի՛ր իրավունքներդ։ Եղի՛ր բարեկեցիկ։