Մտնում ես խանութ, մոտենում ես ատամի մածուկ վերցնելու ու տեսնում ես, որ գինն անցյալ ամսվա համեմատ բարձրացել է: Դու ակամա մտածում ես՝ «Ի՞նչ է, գնա՞ճ է տեղի ունեցել … երևի գները կայուն չեն, և պետք է սպասել նոր փոփոխությունների»։

Արի տեսնենք՝ որքանո՞վ է ենթադրությունդ ճիշտ:

Գների՝ կայուն լինելու դեպքում դու չես նկատում, որ ապրանքների գները ընդհանուր առմամբ փոխվել են, և ձեռք ես բերում նույն ապրանքներն ու ծառայությունները, ինչ որ առաջ՝ առանց մտահոգվելու՝ եկամուտներդ կհերիքե՞ն, թե՞ ոչ: Խոսքը գնում է գնողունակության մասին, երբ չես մտածում՝ արդյո՞ք եկամուտներդ կբավականացնեն այսօր և ապագայում գնումներիդ իրականացման համար: Ստացվում է, որ գների կայունության պարագայում քո գնողունակությունը չի փոխվում:

Գնաճը, ընդհակառակը, գների ընդհանուր մակարդակի բարձրացումն է, որն ազդում է քո ծախսերի վրա: Եթե դու զգում ես, որ այսօր խանութից նույն գումարով կարող ես գնել ավելի քիչ, քան երեկ, ապա սա ամենայն հավանականությամբ նշանակում է, որ կա գնաճ: Ի դեպ, դա կվերաբերվի ամեն տեսակի ծախսին՝ լինի ռեստորանի հաշիվ, կոշիկ գնել, թե՞ վարսավիրական ծառայությունների համար վճարել:

Երբ գները կայուն են, մարդիկ կարող են ճիշտ պլանավորել իրենց ծախսերը, իսկ բիզնեսները՝ իրենց ներդրումները։ Այդ պատճառով Հայաստանի Հանրապետության Կենտրոնական բանկի գլխավոր նպատակներից է գների կայունության ապահովումը: Այդ նպատակին հասնելու համար Կենտրոնական բանկի փորձագետները մշակում և իրագործում են հատուկ քաղաքականություններ, որ քո գնողունակությունը լինի կայուն:

Փոխադարձ վստահության միջավայրում կայացրո՛ւ արդյունավետ որոշումներ, եղի՛ր բարեկեցիկ: