Ենթադրենք՝ քեզ 2 վարկ են առաջարկում, դու ո՞րը կընտրես․

Անշարժ գույքի գրավադրմամբ՝

• վարկ՝ 13%-ով, որի համար կան մի քանի այլ վճարներ՝ նոտարի, ապահովագրության, գույքի գնահատման։ 
• վարկ՝ 15%-ով, բայց այլ վճարներ չկան։

Առաջին վարկը, ինչպես ժողովուրդն է ասում, քեզ վրա «նստելու է» 17%:

Տեսնենք՝ ինչպես։ 

Վարկն ունի երկու տոկոս, մեկն անվանական տոկոսադրույքն է։ Այդ տոկոսով վարկատուն հաշվում է, թե որքան տոկոսագումար ես վճարելու։ Բայց բացի տոկոսավճարից կարող են լինել այլ վճարներ, օրինակ՝ վարկ տրամադրելու և վարկը սպասարկելու միջնորդավճար, գրավի ձևակերպման վճար և այլն: Այս ամենը եթե գումարենք, կստանաք այլ տոկոս, որի անունն է փաստացի տոկոսադրույք։ 

Տարեկան փաստացի տոկոսադրույքը հաշվի է առնում նաև “ժամանակի գինը”, այսինքն՝ թե որքան հաճախ եք մարելու տոկոսագումարները։ 

Ի դեպ բանկը, վարկային կազմակերպությունը և գրավատունը պարտավոր է քեզ տեղեկացնել, թե վարկիդ փաստացի տոկոսադրույքը որքան է, եթե քո վարկը

• սպառողական է, 
• հիփոթեք է,
• մինչև 5 մլն դրամ գյուղատնտեսական վարկ է կամ էլ գերփոքր առևտրային կազմակերպությունների և անհատ ձեռնարկատերերի վարկ է։ 

Համեմատի՛ր փաստացի տոկոսները, եղի՛ր բարեկեցիկ։