Ուզում ես ներդրում անել, բայց չգիտե՞ս՝ որտեղի՞ց սկսել: 

Մի գաղտնիք ասեմ՝ չկա ներդրման լավագույն տարբերակ, ամեն ինչ կախված է քո նախընտրություններից։ Գումարդ կարող է ավելի շատ գումար բերել, կարող է ապահով լինել, կամ էլ ամեն պահի ձեռքիդ տակ լինել։ Սրան անվանում ենք անհնարին եռանկյունի. երկու երնեկ կարող են մեկ տեղ լինել, երեքը՝ ոչ։ 

oԵթե ներդրում ես, ժողովրդի ասած, «սև օրվա համար», նպատակահարմար է խնայողական հաշիվը և ավանդը:

oԵթե ունես երկարաժամկետ նպատակ և կարող ես սպասել, որ գումարդ աճի, կարող ես, օրինակ, ներդնել անշարժ գույքի մեջ։ Երկարաժամկետ ավանդները ևս կարող են օգնել քեզ գումարդ մեծացնելու հարցում։ 

oՊետք է հասկանաս նաև քո ռիսկի ախորժակը։ Ներդրումային օրենքներից է՝ բարձր ռիսկ՝ բարձր եկամուտ, ցածր ռիսկ՝ ցածր եկամուտ։ Ցածր ռիսկով ու կայուն եկամտով ներդրումներից են պարտատոմսերը և ավանդները, բայց մեր երկրում դրանց եկամուտն էլ ցածր չէ։ Բարձր ռիսկով և բարձր եկամտաբերությամբ ներդրումների օրինակ են բաժնետոմսերը, որոնք թողարկվում են տարբեր ընկերությունների կողմից։ Հաճախ են հանդիպում բարձր եկամտաբերությամբ ներդրումային առաջարկներ։ Բայց պետք է վստահ լինել, որ դրանք վստահելի են, իսկ ընկերությունները՝ գրանցված։ Ռիսկի գնալ չի նշանակում լինել անզգույշ։ 

Եթե այդպես էլ չես կողմնորոշվում, հոգ չէ, կարող ես դիմել մասնագետներին՝  ներդրումային ընկերություններին կամ էլ ներդրումային ծառայություններ տրամադրող բանկերին։ 

Սկսի՛ր փոքրից, սովորի՛ր քո փորձից: 

Խնայի՛ր, կատարի՛ր ներդրումներ, եղի՛ր բարեկեցիկ։