Ցանկանում ես փոխել կենսաթոշակային ֆոնդդ կամ կառավարչին, բայց չգիտե՞ս՝ ինչպես. պատմեմ քայլ առ քայլ:

Որպես համակարգի մասնակից՝ դու ցանկացած ժամանակ կարող ես փոխել ֆոնդդ՝ ընտրել նույն կառավարչի այլ ֆոնդ կամ այլ կառավարչի որևէ ֆոնդ: Դեռ ավելին, կարող ես այլ ֆոնդ տեղափոխել ինչպես քո ունեցած կուտակումները, այնպես էլ հետագա կենսաթոշակային հատկացումները։ Երկրորդ դեպքում ստացվում է, որ քո կուտակումները ներդրվում և լրացուցիչ եկամուտ են բերում տարբեր ֆոնդերում միաժամանակ:

Իսկ եթե մի կառավարչից մեկ այլ կառավարչի մոտ ես տեղափոխում, ապա դա անվճար է տարեկան միայն մեկ անգամ, իսկ մնացած դեպքերում գանձվում է միջնորդավճար՝ փոխանցվող կուտակումների 1%-ի չափով:

Ֆոնդի կամ կառավարչի փոփոխության համար անհրաժեշտ (landscape only) է ներկայացնել դիմում, որը կարող ես կատարել առցանց՝ www.cda.am կայքի «ԻՄ ՀԱՇԻՎԸ» համակարգով կամ էլ հաշվի օպերատորների միջոցով` ներկայացնելով անձնագիր և սոցիալական քարտ կամ էլ նույնականացման քարտ։

Հաշվի օպերատորը, այսպես ասած, միջնորդ օղակ է պարտադիր կուտակային բաղադրիչի մասնակիցների և Հայաստանի կենտրոնական դեպոզիտարիայի միջև և օգնում է ընտրել ֆոնդի կառավարիչ, բացել կենսաթոշակային հաշիվ և այլն:

Օպերատորների ցանկը ևս հրապարկված է www.cda.am կայքի «Կենսաթոշակային հաշվի օպերատորներ» հատվածում։

Վերադառնանք դիմումի ներկայացման տարբերակներին։ Արդեն իսկ նշված երկու դեպքում էլ անհրաժեշտ է ներկայացնել «Պարտադիր կենսաթոշակային ֆոնդ և ֆոնդի կառավարիչ ընտրելու դիմում»: Դիմումը համակարգ մուտքագրելուց հետո քո հետագա կուտակային վճարները կուղղվեն արդեն նոր ընտրված ֆոնդ:

Կուտակի՛ր կենսաթոշակիդ համար, եղի՛ր բարեկեցիկ: