Ավա՞նդ ունես բանկում: Երկու կարևոր բան ունեմ քեզ ասելու: Առաջինը՝ ի՞նչ է լինում, երբ ավանդիդ գումարը շուտ ես վերցնում: Երկրորդը՝ ինչպե՞ս է հարկվում քո եկամուտը: Արի՛ քննարկենք:

Մտածում ես խնայողություններդ ժամկետից շո՞ւտ հանել բանկից: Սպասի՛ր: Մտածի՛ր նաև հետևանքների մասին:

Ժամկետային ավանդը նման է խոստումի. դու խոստանում ես գումարդ որոշ ժամանակ թողնել բանկում, իսկ բանկը խոստանում է քեզ ներդրած գումարի դիմաց տոկոսներ տալ: Խոստման խախտումը կարող է ունենալ հետևանքներ՝ ազդելով ստացվելիք տոկոսագումարների վրա։ Եթե ավանդի գումարը պայմանագրի ժամկետից շուտ պահանջես, կարող ես կորցնել ակնկալվող եկամտի մի մասը, օրինակ՝ կարող է ավելի ցածր տոկոսագումար ստանաս կամ էլ առհասարակ չստանաս: 

Նման իրավիճակներից կարող ես խուսափել, եթե՝

1. Անսպասելի ծախսերի համար մի՛շտ գումար պահես հասանելի տեղում: Այդ դեպքում ավանդի գումարը ժամկետից շուտ պահանջելու կարիք չես ունենա:
2. Երկարաժամկետ ավանդի համար առանձնացնես այն գումարը, որի մասին պատրաստ ես ժամանակավորապես մոռանալ։

Խոստացել էի պատմել նաև հարկի մասին, չէ՞: Ուրեմն ասեմ, որ ավանդից ստացած տոկոսագումարը հարկվում է 10% եկամտային հարկով: Օրինակ՝ եթե ստացել ես 30 000 դրամ տոկոսագումար, դրանից 3000-ը վճարելու ես հարկ։ 

Մի կարևոր բան էլ. ինչ էլ անես, չմոռանաս մանրամասն կարդալ ավանդի պայմանագիրը ստորագրելուց առաջ։  Ստորագրելուց հետո էլ վերցրո՛ւ ու պահի՛ր պայմանագրի օրինակդ։ 

Խնայի՛ր, մեծացրո՛ւ գումարդ: Եղի՛ր բարեկեցիկ: