Ներդրումնե՜ր, արժեթղթե՜ր, ֆինանսական շուկա՜. այս բառերը հաստատ լսած կլինես: Արի հասկանանք, թե որն ինչ է և ինչպես կարող է քեզ օգնել:

Ֆինանսական շուկան ու արժեթղթերը միավորում են նրանց, ովքեր կա՛մ ունեն գումար, կա՛մ ունեն գումարի կարիք: Արժեթղթերի միջոցով պետությունները և բիզնեսները ձեռք են բերում գումար, իսկ ներդրողները մասնակցում են նրանց հաջողությանը և ստանում են որոշակի եկամուտ իրենց ներդրումից: 

Արժեթղթերի աշխարհը շատ մեծ է, և այնտեղ կան տարբեր առանձնահատկություններով գործիքներ: Արի՛ այսօր պատմեմ քեզ ամենաշատ հանդիպողների մասին:

Պարտատոմսեր. դու կարծես «պարտքով» գումար ես տալիս պետությանը կամ ընկերությանը, որի դիմաց ստանում ես պարբերական վճարումներ, իսկ ժամկետի ավարտին հետ ես ստանում գումարդ: Որպես կանոն՝ պարտատոմսերը համարվում են համեմատաբար ցածր ռիսկայնությամբ և ցածր եկամտաբերությամբ արժեթղթեր: Նշեմ, որ պարտատոմսերից ստացված եկամուտդ չի հարկվում, ինչը միանշանակ պարտատոմսերի առավելությունն է:

Իսկ բաժնետոմս գնելով՝ դու դառնում ես ընկերության մի բաժնի տերը և կարող ես ստանալ ընկերության շահույթից շահաբաժին կամ այլ կերպ ասած՝ դիվիդենտ: Որոշ դեպքերում կարող ես մասնակցել նաև ընկերության որոշումների կայացմանը: Բաժնետոմսերը համարվում են ավելի ռիսկային գործիքներ, սակայն բարձր եկամուտ ստանալու հնարավորությունը մեծ է:  

Եթե չունես բավականաչափ գումար և ժամանակ տարբեր տեսակի պարտատոմսերում կամ բաժնետոմսերում դիվերսիֆիկացված ներդրումներ կատարելու համար, կարող ես ձեռքբերել ներդրումային ֆոնդի փայ։ Այս դեպքում ներդրողներից ֆոնդը հավաքում է գումար և իր հատուկ ռազմավարությունների համաձայն ներդնում տարբեր արժեթղթերում։ Այս գործիքը օգնում է դիվերսիֆիկացնել ռիսկերը: Ստացվում է, որ միանգամից ներդնում ես տարբեր արժեթղթերում, և տատանումները քիչ են լինում, որի արդյունքում ռիսկը նվազում է, այսինքն՝ մեկ կոնկրետ արժեթղթի պատճառով կորուստը փոխհատուցվում է մեկ այլ արժեթղթի շնորհիվ ստացված եկամտով։

Խնայի՛ր, ներդրումներ կատարի՛ր, եղի՛ր բարեկեցիկ: